وبقيت عريس
---------------
وعدّت الأيام تجري
وبقيت يابني أحلي عريس
وربنا طوّل عمري
عشان ما ا نقي لك وأقيس
إختار عروسة بنت أصول
تعيش ف ضلك كده علي طول
تسمع كلامك مهما تقول
ويكون مايجرحش الأحاسيس
وشرعنا قال ع الزوجة
لو صالحة ح تشوفها تسرّك
ف الغيبة عمرها ما تضرّك
وتكون مطيعة وأحلي ونيس
الست وردة علي عودها
ح تصونها تحمر خدودها
تهملها راح تشكي مرضها
وح تبكي دايما م التفليس
بكلمة حلوة ح تسعدها
وهدية حلوة ف يوم عيدها
وان كنت خالي بوس إيدها
حبة بكش ويا تمحليس
وف يوم أجازتك فسّحها
زوّد تملّي أفراحها
يزيد نشاطها ومرحها
تبقي ف حياتك أحلي جليس
طلباتها واجب تتحضّر
علي قد جيبك مش أكتر
وعشان تعيش مستور وفّر
ما تمد إيدك يوم لخسيس
قابل صحابك يوم برّه
مايجوش ف بيتك بالمرّة
تعيش حياتك ف مسرّة
أصل البيوت دي لها تقديس
وكلمتك ع البيت تمشي
ورأيها ما يخسّرشي
ولو تشورها ماتندمشي
وبعدها تفكّر وتقيس
علّمها تحفظ لك سرّك
لا تقوله لامها ولا لامّك
وللغلط أوعي تجرّك
تنزل عليك الناس تأليس
وإوعي تغلط وتسيبها
عاتبها مرّة وحاسبها
والتالتة تزعل وتسيبها
لحد ماتخاصم إبليس
والشرع قال لك إنصحها
واهجرها بعديها اطرحها
والأهل ممكن تصلحها
أما الطلاق دا بعيد يامغيث
علي طول لحافك رسّيها
علشان ماتطلعشي فيها
وح تتدين لو تجاريها
ويوم ح تصبح م المحابيس
ويومها ح تقول أنا حرّة
ليه اكون مراتك بمضرّة
دنا اعيش حياتي ف مسرّة
وح اخلعك وأشوفلي عريس
شوف دار فلانة إيه فيها
وجوز فلانة مهنّيها
إشمعني إنت مشفّيها
ليه تبقي يابني من المتاعيس
وان جه نسيبك يوم زارك
إفتح له قلبك مع دارك
وعشان تكمّل مشوارك
تكون مهذب كده وحسيس
حاجة أخيرة ودي لازمة
خلّف لك اتنين مش رزمة
تقدر تجيب هدمة وجزمة
تفرح بمظهرهم وتهيص
ودا اللي جدّك قالهولي
مع خبرتي بعرضي وطولي
ويوم ماتخطب علي قولي
ح تقول كلامي مكانش رخيص
أم الشعراء
سامية سليمان محمد
تحرير :
رئيس مجلس إدارة الجريدة
ورئيس التحرير
الشاعر والكاتب المسرحي
علاء محروس مرسي
ليست هناك تعليقات:
إرسال تعليق
ضع تعليقا لمجلتكم :
هل أوفينا ؟
هل لكم إقتراحا لمجلتكم ؟
ما طلبكم قبل نشر مقالكم ؟
رئيس مجلس الإدارة ورئيس التحرير
الأديب والشاعر الجريح
علاء محروس مرسي